Minii blog

Бид сармагчингийн үр сад уу, бурханы бүтээл үү?2008 оны 7 сарын 9 Хүн төрөлхтөн эрт дээр үеэс өөрсдийн түүх, угсаа гарлаа сонирхон судалсаар иржээ. Мэдээж хэрэг бидний өвгийн өвөг анхны хүн хаана, хэдийд, ямар нөхцөлд үүсэн бий болсон бэ гэдэг хүн бүрийн сонирхлыг татдаг асуудал юм. Энэ нь археологи, антропологи, зоологийн шинжлэх ухаанд хэдий­нэ шийдвэрлэгдсэн боловч ажиг­лаад байхад манайхан хүний үүсэл гарлын тухай ямар ч цэгц­тэй ойлголтгүй байдаг. Энэ нь хүмүүсийг төөрөгдүүлсэн янз бүрийн явган яриа, үндэслэлгүй таамаглалууд олон байдагтай холбоотой юм. Ямар сайндаа л нэгэн дээд сургуулийн багш, төв Азид, тэр дундаа Монгол оронд, нарийндаа бол Орхоны хөндийд анхны хүн үүссэн гэж ярьж байхав дээ.   Хүний үүсэл гарлын тухай маш олон онол таамаглал байдаг бөгөөд тэдгээрийг шинж чанарын хувьд үндсэн хоёр бүлэгт хуваадаг нь а/ Бүтээлийн онол, б/ Хувьслын онол юм. Бүтээлийн онол гэдэгт хэн нэгэн эзэн бурхан юм уу, эсвэл харь гарагийнхан, ямар нэгэн далд хүчин зүйл хүн төрөлхтнийг бүтээсэн гэж үздэг бол хувьслын онол гэдэгт сармагчин юм уу, эсвэл үлэг гүрвэл хувьсан өөрчлөгдөж хөг­жих явцад хүн үүсэн бий болсон хэмээх үзэл юм. Мэдээжээр энэ асуу­дал одоо нэгэнт шийдэгд­сэн бөгөөд Английн судлаач Чарльз Дарвины үндэс­лэсэн хувьслын онолыг дэлхий нийтээр хүлээн зөв­шөөрч байна. Хүн хувьслын үйл явцад үүсэн бий болсон юм бол чухам юунаас үүссэн, нэг цэгт үүссэн үү, хоёр гурав, түүнээс олон цэгт үүссэн үү гэдэг асуудал бас байдаг.   Судлаачид эртний хүний хөгжил дэвшлийг үндсэн дөрвөн бүлэгт хуваан авч үздэг. Энэ нь: Austrolopiticus буюу өмнөдийн сармагчингууд Homohabiles буюу чадварлаг хүн Homoerectus буюу цэх хүн Homosapiens буюу ухаант хүн зэрэг юм.   Харин Архантроп, Сенантроп, Олдувей, Неандарталь зэрэг нь хүний хөгжлийн бүлэг биш аль нэг алдартай олдворын нэр юм. Эдний аль нь ч дээрх дөрвөн анги­ллын нэгэнд нь багтана. Хүмүүс үүнийг хооронд нь хольж хутгах нь нэлээд түгээмэл байдаг. Уг нь Homoerectus-ыг босоо хүн гэж нэрлэдэг байсан боловч Люси, Летолли хэмээх Austrolopiticus-ын хоёр алдартай олдвор тэднийг босоогоор явж байсныг баталсан юм. Тиймээс Homoerectus-ыг цэх хүн хэмээн нэрийдэх болсон билээ.   Хүн төрөлхтний хам­гийн балчир үе буюу хамгийн эртний хүний өвөг болох Austrolopiticus-ын үлдэгдэл өнөөг хүртэл зөвхөн Өмнөд болон Зүүн Өмнөд Африкаас л олддог ажээ. Харин Homohab­iles-ын үлдэг­дэл Төв Африк, Явын арлууд, Homo­e­rec­tus-ын үлдэг­­дэл Афри­кийн бүх нутаг, Ази, Европоос олд­­дог юм байна.  Зарим кинон дээр эртний хүмүүс үлэг гүрвэ­лүүдтэй тулалдаж буйгаар гардаг. Гэтэл үнэн­дээ хүн төрөлхтөн 5 сая орчим жилийн өмнө үүссэн бол харин үлэг гүрвэлүүд 65 сая жилийн өмнө мөхөж үгүй болсон шүү дээ. Харин хүн юунаас үүссэн бэ гэвэл олон сая жилийн өмнө өндөр хөг­жилт бичин сар­магчин, хүн хоёр нэг эхээс салбарласан гэж үзэх болсон байна. Austrolopiticus Өмнөд болон Зүүн Өмнөд Африкийн гол төлөв агуй­гаас, хөдөлмөрийн багаж зэвсэггүй, зөвхөн гавлын ясны үлдэгдэл олдох нь элбэг байдаг байна. Энэ нь тэд багаж зэвсэггүй байсандаа бус, эртний хүний гол эрлэг болох арслангийн идэш болсонд байгаа юм. Арслан өвөг дээдсийг минь ангуучлан барьж үүрэндээ аваачиж иддэг байжээ.   Бидний өвөг эцэг, түүний эцэг, элэнц, хуланцыг мэдээж хүн гэнэ. Харин түүний өвөг гэж хөөсөөр өндөр хөгжилт бичийг хүртэл чухам аль үеэс хүн гэж нэрлэх вэ гэдэг ээдрээтэй асуудал гарч ирнэ. Өндөр хөгжилт бичин сармагчнаас бага багаар тасралтгүй хөгжин хүн болоход аав, хүү хоёрын чухам алийг нь сармагчин, алийг нь хүн гэх вэ? Энэ бол тун төвөгтэй боловч зайлшгүй тавигдах ёстой асуулт. Энэ асуултад хуучин: “Бичин хүн өөрийн хөдөлмөрийн багаж зэвсгээ бүтээдэг болсон чухам тэр цагаас түүнийг хүн гэж үзнэ” хэмээн хариулдаг байжээ. Гэтэл одоо ч гэсэн Африкийн өндөр хөгжилт бичнүүд голын хайргыг хугалан гарсан ир ирмэгээр нь наргил модны жимсийг хагалж иддэг байна. Тэгвэл сүүлийн үед “Хөдөлмөрийн багаж зэвсгээ зориуд ухамсарлаж системтэйгээр үйлдвэрлээд, түүнийгээ дахин дахин хэрэглэх болсон үеэс хүн гэж үзнэ” хэмээн хариулах болжээ.   Хүмүүс бид өөрсдийгөө өмөөр­дөг­төө ч юм уу, адгуус амьтнаас хавьгүй дээр, бид бурхнаас заяасан гэж боддогтоо ч юм уу ямар ч байсан “сармагчингаас үүссэн” гэдгийг хүлээн зөвшөөрөх дургүй байдаг бололтой. Тий­мээс шинжлэх ухааны ямар ч үндэслэлгүй, бизнесийн зорилгоор ч юм уу, шашны мунхруулгаар, эсвэл бусдыг төөрөгдүүлэх зорил­­го­той элдэв худал онол таамаглалын номонд мөнгөө гарз­даж, янз бүрийн явган ярианд итгэсээр байна. Хэдий болтол бид “өндөр хөгжилт бичин сармагчин, хүн хоёр нэг эхээс салбарласан” гэдэг шинжлэх ухаанаар хөтөл­бөргүй баталсан онолтой эвлэрэх­гүй явах вэ.